Adimen artifiziala eta automatizazioak, Gipuzkoako enpresa txiki eta ertainen neurrira
Zer erraztu nahiko zenukete zuen lanean?
Datu berak behin eta berriz sartzen dituzue? Informazioa bilatzen denbora gehiegi galtzen duzue? Aurrekontuak pilatzen zaizkizue? Kontatu Mirentxuri. Zer alda dezakezuen, adimen artifizialak edo automatizazioek nola lagun dezaketen eta horretarako zer beharko zenuketen azaltzen lagunduko dizu.
Erantzunak adimen artifizial batek sortzen ditu, eta akatsak izan ditzakete. Elkarrizketa gorde egiten da, gero harekin jarraitu eta berrikusi ahal izateko. Zer egiten dugu zure datuekin?
Hasteko ideia batzuk
Hauetako zerbait gertatzen zaizue?
Batzuetan lan errepikakor bat arindu nahi dugu. Besteetan, erabaki bat hartzeko informazioa behar dugu. Adibide hauetan ikus dezakezu Mirentxuk nola lagun diezazukeen.
Galdera
Diru gehiegi dugu biltegiko izakinetan, baina gutxiago erosiz gero produkturik gabe geratzeko beldur gara.
Mirentxuren erantzuna
Biltegian gutxiago edukitzea eta produkturik gabe ez geratzea batera landu behar dira. Lehenik, salmenten datuak, egungo izakinak, jaso gabe dauden eskaerak eta hornitzaileen benetako entrega-epeak bildu beharko zenituzkete. Ahal dela, urtebete baino gehiagoko salmentak, urte-sasoiaren eragina ikusteko. Hortik, produktu bakoitzetik zenbat beharko duzuen eta noiz eskatu kalkula daiteke, gutxieneko izakinak, erosketa-loteak eta iraungitze-datak kontuan hartuta. Produktu multzo batekin hasi, eta aste batzuetan proposamena zuek erosiko zenuketenarekin alderatzea komeni da, kalkulua egokitzeko. Gero, ERPko datuekin automatikoki eguneratu daiteke. Taldeak erosketa-proposamena berrikusiko luke eskaera egin aurretik.
Galdera
Informazio bera ERPan eta beste programa batzuetan sartzen dugu. Ezin al da behin bakarrik sartu?
Mirentxuren erantzuna
Helburua hori litzateke: datuak behin sartu eta behar diren tresnetan eskura izatea. Lehenik, non sartzen dituzuen eta gero nork erabiltzen dituen argitu behar da. Datu mota bakoitzerako —bezeroak, artikuluak, eskaerak…— zein sistema hartuko den erreferentziatzat ere erabaki behar da. Ondoren, programek zer aukera ematen dituzten aztertu: APIa, konektoreak edo fitxategiak. Horren arabera, datuak automatikoki pasatzeko konexioa presta daiteke, bikoizketak kontrolatzeko eta datuak bat ez datozenean abisatzeko. Datu mota bakarrarekin hastea komeni da: probatu, akatsak aztertu eta, ondo dabilela ziurtatu ondoren, eskuz kopiatzeari utzi.
Galdera
Galdera bati erantzuteko, mezu elektronikoetan, karpetetan eta hainbat programatan bilatu behar dugu.
Mirentxuren erantzuna
Hasteko, bi gauza argitu beharko zenituzkete: zer galdera errepikatzen diren eta erantzuteko informazioa non dagoen. Gero, iturriak konekta daitezke leku bakar batetik kontsultatzeko, edo aldian-aldian eguneratuko den ezagutza-oinarri bat prestatu. Adimen artifizialak bilatzen eta laburtzen lagun dezake, baina pertsona bakoitzaren sarbide-baimenak errespetatu behar ditu, eta erantzuna zein dokumentutatik atera duen erakutsi. Taldearen benetako galderekin probatu behar da, fidatu aurretik. Eta beste erabaki bat ere behar da: nor arduratuko da informazioa eguneratuta edukitzeaz?
Galdera
Datozen hilabeteetan ordainketei aurre egiteko nahikoa diru izango dugun jakin nahi dugu.
Mirentxuren erantzuna
Gaur duzuen diruarekin batera, datozen sarrerak eta irteerak ikusi behar dira: bankuko saldoak, kobratu eta ordaindu gabeko fakturak, nominen, zergen eta maileguen epemugak, eta espero dituzuen salmentak eta erosketak. Horrekin, astez asteko edo hilabetez hilabeteko aurreikuspena egin daiteke, ziurra dena eta zenbatetsitakoa bereizita. Aurreko kobrantzen datuak badituzue, bezero bakoitzak zenbat atzeratu ohi duen ordainketa ere kontuan har daiteke. Gakoa aurreikuspena eguneratuta edukitzea da, ahal dela bankuko eta kontabilitateko datuak automatikoki jasoz. Horrela, egoera desberdinak alderatu ditzakezue: zer gertatuko litzateke bezero handi batek hilabete beranduago ordainduko balu?
Galdera
Lehentasunak aldatzen direnean, kosta egiten zaigu tailerreko lana berrantolatzea.
Mirentxuren erantzuna
Entrega-datak ez dira nahikoa. Jakin behar da nork edo zer makinak egin dezakeen lan bakoitza, zenbat denbora behar duen, zer material behar den eta aurretik zer amaitu behar den. Hori jasota, plangintza-tresna batek lanen ordena proposa dezake, duzuen ahalmena eta lehentasunak kontuan hartuta. Presazko lan bat sartzen denean, gainerakoei nola eragiten dien ere erakuts dezake. Horretarako, eskaerak, material-izakinak eta lan bakoitzaren aurrerapena eguneratuta egon behar dira. Bestela, plangintzak berehala galtzen du balioa. Arduradunak, gainera, proposamena zuzendu ahal izan behar du.
Galdera
Teknikariek lan-partea betetzen dute. Gero, bulegoan datu berak berriro sartzen ditugu fakturatzeko.
Mirentxuren erantzuna
Datuak behin bakarrik jaso beharko lirateke: orduak, joan-etorriak eta materialak lan-parte digitalean sartu, eta hortik fakturaren zirriborroa sortu. Lehenik, parteak fakturatzeko behar den guztia jasotzen duela ziurtatu behar da: bezeroa, obra, tarifak eta materialen erreferentziak. Gero, lan-parteen aplikazioa eta fakturazio-programa API edo fitxategi bidez nola konektatu aztertu. Kasu bereziak ere zehaztu behar dira: prezio bereziak, osatu gabeko parteak edo erreferentziarik gabeko materialak. Bulegoak horiek berrikusiko lituzke, dena berriro kopiatu beharrean. Eskuzko lana kendu aurretik, komeni da denbora batez zirriborroak benetako fakturekin alderatzea.
Galdera
Aurrekontuak prestatzen joaten zaigu denbora gehiegi. Zer erraztu dezakegu?
Mirentxuren erantzuna
Bereizi beti antzera egiten duzuena eta zuen irizpidea behar duena. Partidak bilatzea, tarifak aplikatzea, kopuruak kalkulatzea eta formatua ematea erraztu daitezke, partiden eta prezioen datu-base eguneratu batekin eta kalkuluak egiten dituen txantiloi batekin. Adimen artifizialak bezeroaren mezua, planoa edo zerrenda irakurtzen lagun dezake, eta partidak edo lehen testu bat proposatu. Prezioak, zer sartzen den eta baldintzak, ordea, pertsona batek berrikusi behar ditu beti. Ondo funtzionatzeko, tarifak eguneratuta eta aurreko aurrekontuak ondo antolatuta eduki behar dira, berrerabili eta alderatu ahal izateko.
Galdera
Hornitzaile bakoitzak bere formatuan bidaltzen ditu tarifak eta dokumentuak. Dena eskuz berrikusten dugu.
Mirentxuren erantzuna
Lehenik, hainbat hornitzaileren dokumentuak bildu eta zer datu behar dituzuen zehaztu: erreferentzia, deskribapena, prezioa, unitatea eta noiz arte balio duen. Adimen artifizialak PDFetatik eta kalkulu-orrietatik atera ditzake, formatua desberdina izan arren. Baina gero lerro bakoitza zuen barne-erreferentziarekin lotu behar da. Hor sortzen dira zalantzak: kode desberdinak, beste neurri-unitate batzuk edo produktu berriak. Komeni da falta diren datuak eta ohiz kanpoko prezio-aldaketak automatikoki antzematea, eta ERPa eguneratu aurretik pertsona batek berrikustea. Hainbat hornitzaileren benetako dokumentuekin probatuta ikusiko da zer egin daitekeen eskuzko esku-hartzerik gabe.
Galdera
Etengabe eteten digute lana eskaera non dagoen edo noiz iritsiko den galdetzeko.
Mirentxuren erantzuna
Lehenik, zer galdetzen dizueten eta erantzuna non dagoen ikusi behar da: eskaeraren egoera, entrega-data edo garraiolaria. Datuak ERPan edo garraiolariaren webgunean badaude, bezeroak bere kabuz kontsultatzeko aukera presta daiteke. Eskaeraren egoera aldatzean abisu automatikoak ere bidal daitezke. Posta elektronikoz edo txatean erantzungo duen laguntzaile bat erabiliz gero, baimendutako datu eguneratuekin bakarrik lan egin behar du. Ez du datarik asmatu behar, eta arazoak edo informazio nahikorik gabeko kasuak pertsona bati bideratu behar dizkio. Horren guztiaren oinarria jarraipen-datu fidagarriak izatea da.
Galdera
Bezeroei buruzko datu asko ditugu. Nola erabili ditzakegu zerbitzu hobea edo berri bat eskaintzeko?
Mirentxuren erantzuna
Bezeroaren beharretik hasiko nintzateke: zer erabaki hartzen edo zer arazo konpontzen lagundu nahi diozue? Agian aldizkako txosten bat, abisuak edo gomendioak baloratuko lituzke. Ondoren, datuek horretarako balio duten begiratu behar da: nahikoa osatuak diren, lotu daitezkeen eta bezeroekin adostutakoaren arabera erabil ditzakezuen. Hortik, azterketa diseinatu eta haren prestaketa automatiza daiteke, zerbitzuak eskuzko lan-ordu askorik eskatu ez dezan. Adimen artifizialak joerak antzematen edo azalpenak idazten lagun dezake. Balioa, ordea, zuen irizpide profesionalak eta bezeroarekiko harremanak ematen dute. Bezero gutxi batzuekin proba egiten hastea komeni da.
01 / 10
Aukerak azaltzeko sortutako adibideak dira, ez benetako kasuak. Enpresa bakoitzean prozesuak, datuak eta tresnak aztertu behar dira irtenbidea zehazteko.
Mirentxuri buruz jakin beharrekoak.
Mirentxuk zer egiten du? Eta zuek?
Mirentxuk aukerak azaltzen eta zuen egoerari nola heldu ikusten laguntzen dizu. Praktikara eraman nahi baduzu, ERALDATUko taldeak kasua aztertu, zer egingo den zehaztu eta irtenbidea garatzen du. Mirentxuk ez du bere kabuz aldaketarik egiten zuen tresnetan.
Ez dakit zer automatizatu. Hitz egin dezakegu hala ere?
Bai. Kontatu denbora kentzen dizuen lan bat, maiz gertatzen den arazo bat edo egin nahiko zenuketen zerbait. Ez duzu irtenbidea aurrez jakin behar. Mirentxuk aukerak aztertzen eta hurrengo urratserako zer informazio falta den ikusten lagunduko dizu.
Nire datuak eman behar al ditut Mirentxuri galdetzeko?
Ez duzu harremanetarako daturik eman behar Mirentxuri galdetzeko. Taldearekin jarraitu nahi baduzu, horretarako eman ahal izango dizkiguzu. Elkarrizketa gorde egiten da, txateko pribatutasun-informazioan azaltzen den moduan.
Ideiatik praktikara pasatu nahi duzu?
Mirentxurekin aukerak azter ditzakezu. Aurrera egiteko, gure taldearekin hitz egin: kasua aztertu, zer lan egingo dugun adostu eta irtenbidea garatuko dugu. Martxan jarri ondoren ere, zuekin hobetzen jarraitzeko.